Mangngalap, natiliw a nagbongbong

SANTA, Ilocos Sur – Iti baet ti kampania ti Bureau of Fisheries and Aquatic Resources ken gobierno probinsial maikontra iti illegal a panagkalap, adda latta agiliblibas nga agisayangkat iti panagbongbong.

Idi agsapa ti Abril 14, tiniliw dagiti polis ti maysa a mangngalap ditoy nga ili gapu iti panagbongbongna iti paset ti karayan Abra a sakup ti Barangay Nagpanaoan.

Natiliw ni Victor Advincula, Jr. y Amor, 41, naasawaan, ken residente iti Barangay Mabilbila, iti akto nga aguk-ukkon kadagiti timpaw a nadumaduma ti klaseda a nabongbongan nga ikan.

Mapapati a kadua ni Advincula da Ronnie Burcena, Edgardo Reclusado, ken Joel Queddeng, agpapada a residente iti Barangay Manueva, a sakbay iti kanalbuong, nakitada nga agibatbato iti naibotelia a dinamita.

Nakakumpiska dagiti nagresponde a polis iti maysa a di bimtak a botelia a naglaon iti ammonium nitrate, basket ti ikan ken dadduma pay a paraphernalia iti igid ti karayan a nagbongbongan dagiti suspek.

Naipan ni Advincula agraman dagiti nakumpiska iti police station ti Santa para iti maiyannatup a disposision ken dokumentasion.#