Footer

Mangngalap, natiliwan nga agbongbongbong

CAOAYAN, Ilocos Sur – Maysa a mangngalap ti natiliwan dagiti polis ditoy nga  agkalkalap babaen ti bongbong iti kabaybayan a sakup ti Barangay Villamar ditoy nga ili idi malem ti Enero 4.

Naipan iti police station ni Johnny Quiban y Panela, 46, naasawaan, residente iti Barangay Villamar ken nakumpiska dagiti binungbongna nga ikan ken ti bangkana.

Madama ti panagpatrolia dagiti polis a nakalugan iti bangka idi makangegda iti kanalbuong manipud iti kabaybayan. Dinagdagusda ti nagturong iti naggapuan ti kanalbuong ket nadatnganda ni Quiban nga agbungbongbong.

Naglibas dagiti kakaduana idi mapasungadanda dagiti polis.

Nupay kasta, nabigbig dagitoy a da Randy Quillopo, Rudy Quindipan ken Ramil Quindipan, agpapada nga agnaed iti Barangay Villamar.

Nakumpiska ken ni Quiban ti fishing paraphernalia a maawagan iti karuas, dagiti nabungbong nga ikan nga aridengdeng ken innalada pay ti bangka daytoy a nagmarka iti Jomar.

Pinaeksamen dagiti polis ken ni Benedicto Saraos, provincial regulatory officer, dagiti nakumpiska nga ikan ket pinaneknekanna a nabungbong dagitoy.

Nupay maiparit ti illegal a panagkalap ditoy probinsia, adda latta dagiti sukir a mangngalap nga agisayangkat iti panagbungbong ken panagdinamita.#