Mangngalap, pinatay ti paligpalig ti motor

CABUGAO, Ilocos Sur – Natay ti maysa a mangngalap gapu iti aksidente a pannakasugsugatna babaen ti paligpalig ti demotor a bangkana iti kabaybayan ti Barangay Daclapan ditoy nga ili idi aldaw ti Mayo 31.

Iti report ni Daclapan Barangay Captain Quirino Manuel iti polis, impatay ni Aristotle Torrate y Sarandi, 30, naasawaan, mangngalap, dagiti sugatna iti nadumaduma a paset ti bagina a gapuanan ti agtaytayyek a paligpalig ti motor a naikabit iti bangkana.

Mapapati nga aksidente a natinnag ti biktima iti danum ket naisuyo iti agtaytayyek a paligpalig ti motor a puon ti nakatayanna a dagus.#