Footer

Mangrugi ti panagbalbaliw kadagiti agtuturay

ITAY nabiit, rimkuas ti rikna dagiti Filipino gapu iti eksena iti maysa nga episode ti “Desperate Housewives” a nagkunaan ti karakter nga inakem ni Teri Thatcher nga adda kunkunana dagiti medical schools iti Pilipinas.

Kadatayo a Filipino, kaarigna maysa a tungpa ti ladawan a naimula iti panunot dagiti nakabuya iti nasao a programa.

Napagbalin a nababa ti imahe dagiti eskuela medikal, ngarud pagduaduaan ti kabaelan dagiti doktor ken nars a produkto dagitoy a pagadalan.

Saan ngarud a nakakaskasdaaw a rumkuas ti timek dagiti kailiantayo a nangkondenar iti daytoy a programa a nangited iti dakes a ladawan dagiti Filipino.

Ta napateg ti dayaw ken ni Pilipino. Kas kapateg ti biagna ti dayawna. Irupakna uray pakatayanna no magamsaw ti dayawna. Salimetmetan, kupikopan ken madadaan a mangsalaknib iti dayawna!

Ngem adda met pagsasao: “Ibagam dagiti gagayyemmo ta ibagak no asinoka.” Wenno, “Ibagam no ania a klase dagiti lidermo ta ibagak no aniaka a pasurot.” Wenno iti nalawlawa a pangarigan: “Ibagam no ania a pagilian ti naggapuam ta ibagak no ania ti klasem nga umili.”

Napait nga annugoten ngem saan a nasayaat ti imahe ti pagiliantayo gapu kadagiti negatibo a damdamag a mabasbasada.

Madakamattayo ditoy ti kontrobersia a pinarnuay ti mapapati a leakage iti eksamen para dagiti nars a nakainaigan dagiti review schools, ti kaadda dagiti pagadalan a makunkuna a diploma mills, ti nawarnak a kaadda dagiti agar-aramid iti peke a diploma iti Claro M. Recto.

Iramantayo dagiti takuat kadagiti panagadal ken surbey a maysa ti pagilian kadagiti most corrupt a pagilian. Sa dagiti anomalia ken panagsuitik a mapapati a nakaisangkotan dagiti agtuturaytayo, kas iti Hello Garci scandal, anomalia iti ganagan, sa iti kaudian, ti national broadband network.

Dagitoy  simngaw a dakes nga aramid ti posible a nakaimulaan iti dakes nga panagkita dagiti ganggannaet iti pagiliantayo. Dagitoy ti “mantsa” a nangmilat iti Filipino ket nairamraman amin dagiti makabael a dodoktor ken narses nga agtrabtrabaho iti sabali a pagilian.

No suitik dagiti agtuturay, di karkardayo nga iti panunot dagiti ganggannaet, suitik dagiti umili. Ta saan nga agbunga iti paria ti tarong.

Marukodtayo a kas tao babaen ti aramidtayo. Iti imatang dagiti ganggannaet, nababa ti pakarukodantayo isu a dida agtungkua a manglais iti kinataotayo.

No natugkik man ti riknatayo, agbalin koma daytoy a manglukat iti matatayo, nangruna dagiti agtuturaytay,o tapno aturentayo daytoy a panagkitada kadatayo.  Ipakitatayo kadakuada a biddut ti impressionda kadatayo agsipud ta pulitayo a rumbeng a maraem ken tangaden.

Ngem masapul a mangrugi ti panagbalbaliw kadagiti agtuturaytayo.#