Manhunt operation iti aglemlemmeng a mayor, imminget

BANGUED, Abra – Mabirbirok pay laeng ti mayor ditoy nga ili a mapapati a naglemmeng kalpasan a naiparuar ti warrant of arrest maikontra kenkuana gapu iti kaso ti pammapatay a mapapati a nakainbolbaranna idi kanikanem a tawen.

Kinuna ni Cordillera Police regional Director Chief Supt. Benjamin Magalong nga imminget ti manhunt operations maikontra ken ni Mayor Ryan Seares Luna tapno sanguenna ti kaso a naisaklang kontra kenkuana.

Sakbay daytoy, mapapati nga imparipirip ni Mayor Luna ti isusukona kadagiti otoridad tapno sanguenna ti kasona ngem ngem kinuna dagiti kakabsatna a saanda a kanunonganĀ  daytoy agsipud iti amakda nga agpeligro ti biagna no maibalud iti ilida.

Napaay dagiti nagtitipon nga operatiba ti Mobile Group, Special Action Force ken ti Abra Provincial Police Office nga indauluan ni Provincial Director Benjamin Lusad a nangiserbi iti warrant of arrest ken ni Luna idi rabii ti Abril 29 agsipud ta saanda a nadatngan daytoy iti balayna sadiay Dangdangla, Bangued.

Kabayatanna, nagbantay dagiti pasurot ni Mayor Luna iti sanguanan ti munisipio idi Mayo 6, umuna nga aldaw a panagtugaw ni Vice Mayor Allan Seares a kas mayor kalpasan a nagsapata a mangsukat ken ni Luna.

Saan a nagtuloy ni Seares a nagtugaw tapno malapdan ti dakes a mapasamak.

Pinirmaan ni Judge Jaime L. Dojillo, Jr. ti Abra Regional Trial Court, Branch 2 tiĀ  warrant of arrest maikontra ken ni Luna kalpasan nga imbilin ti Department of Justice ti pannakairaman ni Mayor Luna kas co-accused iti pannakapapatay ni Brenda Crisologo, asawa ni Tineg Mayor Edwin Crisologo, bayat ti panagbilangan iti butos iti munisipalidad ti Tineg idi eleksion ti Mayo 2007 iti maikapat a kadsaaran ti Holy Spirit Academy.

Karaman a naibilin a maaresto da dati a Tineg Mayor Pedro Benwaren, dagiti annakna a Lenin Benwaren kenĀ  Tony Benwaren, Henry Lee Tan, Robert Aliping kenĀ  Jonathan Libuen.

Maysa a saksi ti mapapati a nakakita ken ni Luna a nangitudo iti tirador ken ni Crisologo sakbay ti pammaltog sa pimmanaw iti pakaang-angayan ti canvassing of votes.

Maysa a Totoy Buyao, ti mapapati a nangpaltog ken ni Crisologo babaen ti cal. 45. Nagudas ni Buyao gapu iti pannakipinnaltogna kadagiti nagresponde nga immarayat a polis ken soldado.

Maysa a saksi ti nagkuna a nakitana ni Buyao a dimsaag manipud iti maysa a behikulo a mapapati a kukua ni Luna sakbay ti pammapatay.

Ngem binabalaw ketdi ti pamilia ni Luna ti pannakaitiempo ti pannakaiyisio ti nasao a warrant of arrest iti panagturposen ti kampania para iti masungad nga eleksion.

Segun iti pamilia ni Luna, ā€œpolitically motivatedā€ ti pannakalukat manen ti kaso ken tiempo tiĀ  pannakaiyisio ti warrant of arrest maikontra iti mayor. #