Mannalon a biktima ti bagyo, tulongan ti gobierno munisipal ti Cabugao

CABUGAO, Ilocos Sur – Nagtignay ti gobierno munisipal ditoy tapno matulongan dagiti mannalon a biktima ti Bagyo Mina a nangdalapus iti probinsia itay napan a bulan.

Kanaig daytoy, nangangay ni Mayor Dio Caesar Suero iti emerhensia a miting a nangayabanna ken ni Konsehal Santella, chairman ti komite ti Agrikultura, Dr. Cesar Soller, consultant, ken dagiti empleado ti Department of Agriculture tapno matulongan dagiti mannalon a nadidigra iti Bagyo Mina.

Iti report nga indatag ti municipal agriculture office, agdagup iti P1.8 milion ti aktual a damages a sinagrap ti benneg ti agrikultura ditoy gapu iti Bagyo Mina.

Kinuna ti mayor nga agdagup iti 275 ektaria dagiti nadadael a produkto a pakairamanan ti 123 ektaria a namulaan iti mais, 48 ektaria a namulaan iti sandia, 50 ektaria a namulaan iti lasona ken sili, ken nasurok a 40 ektaria a namulaan kadagiti nadumaduma a natnateng a mapattpatta nga agpateg iti P1.8 milion.

Innayon ni Suero nga agpateg iti P176,000 dagiti coastal projects a dinadael ti dimmalapus a Bagyo.

Naammuan iti mayor a napag-aanamonganda iti miting nga agkiddaw ti gobierno munisipal iti tulong iti gobierno probinsial ket no adda pagkuranganna, mangilatangda iti pundo manipud iti calamity fund tapno matulongan dagiti mannalon.

Segun iti mayor, maiwaras dagiti bukbukel kas tulong kadagiti mannalon a biktima ti bagyo.#