Mannalon, agproblema iti padanum

BANTAY, Ilocos Sur – Iti baet nga adda naipasdek a Banaoang Pump Irrigation Project, agproblema dagiti mannalon iti sumagmamano a barangay ditoy nga ili iti pagpasayakda kadagiti talonda.

Kinuna ti maysa a barangay captain a nupay adda irigasion a naipasdek, nauneg ti pangawidanda iti danum isu a dida makapagpasayak iti kataltalonanda ken makagapu iti saanda a makapagmula para iti second cropping.

Kinuna ti nasao nga opisial nga inyarungaingdan daytoy a problemada iti National Irrigation Administration ngem mapapati nga awan pay ti aksion ti nasao nga ahensia.

“Sapay koma ta mairemedioda a maipabangkag ti danum tapno iti kasta mapasayakan met dagiti talonmi,” kinuna ti barangay captain.#