Mannalon, binagsol ti barangay tanod

STO. DOMINGO, Ilocos Sur – Daga ti puon ti nagririan ti maysa a mannalon ken tanod a nakaigapuan ti panangbagsol ti naudi iti immuna.

Binagsol ni Rolie Tabuyo y Bonnao, 42, baro, barangay tanod ken residente iti Barangay Paguraper, ditoy nga ili ni Juanito Tabuyo y Ragindin, 56, naasawaan, mannalon ken kalugaranna babaen ti imuko nga agatiddog iti sumurok kumurang 35 sentimetro agraman ti pagiggaman.

Segun iti report, madama ti panagiinom ti suspek ken ti biktima iti nipa hut ti immuna, kaduada ti maysa a Rudy Cardenas idi naaddaanda iti nabara nga argumento maipapan iti daga.

Mapapati a binato ti biktima ti suspek iti botelia ket napuntaan ti makannawan a pingping daytoy.

Nakapungtot met ti suspek ket innalana ti imukona sana binagsol ti biktima iti tian ken barukongna.

Naitaray ni Juanito iti Tolentino Clinic and Hospital ngem indeklara ti nangtaming kenkuana a doktor nga awanen ti biagna.

Boluntario met a simmuko ti suspek iti padana a barangay tanod sa naipaima kadagiti nagresponde a polis.#