Mannalon, binagsol ti kabsatna

SANTA, Ilocos Sur – Nabara nga argumento bayat ti panagiinomda ti ramut ti nangbagsolan ti maysa a mannalon iti kabsatna iti Sitio Cabuaan, Barangay Mabilbila ditoy nga ili idi sardam ti Disiembre 17.

Kas nailanad iti police blotter, naggiinom ti suspek a nainaganan Judy Belano y Adviento, 28, baro, mannalon, ken residente iti nadakamat a barangay; ti kabsatna a ni Antonio Belano y Adviento, 41, naasawaan, mannalon, ken dadduma a di nainaganan a kakaduada, ket naparnuay ti nabara nga argumento iti nagbaetan dagiti agkabsat.

Mapapati a pimmanaw ti suspek ngem sinurot ti biktima ket kinaritna nga agboksingda a puon ti nagpungtotan ti suspek ket nangala iti kutsilio sana binagsol ti kabsatna.

Naitaray ni Antonio iti Gabriela Silang General Hospital idinto a simmuko ti suspek iti polis.#