Mannalon, binagsol ti kalugaranna

SAN ESTEBAN, Ilocos Sur – Binagsol ti maysa a mannalon ti kalugaranna gapu iti suspetsana nga inlemmeng daytoy ti paltogna bayat ti panagiinomda sadiay Barangay Cabaroan, ditoy nga ili idi parbangon ti Agosto 3.

Iti pannakaisurat daytoy, agpapaimbag ni Leonardo Vidal y Castro, 58, residente iti nadakamat a barangay iti Candon General Hospital gapu iti pannakabagsol ti makannawan a tianna.

Nainaganan ti suspek a ni Danilo Querubin y Berzabal, 61, kalugaran met laeng ti biktima.

Segun iti polis, bayat ti panagiinom ti suspek ken ti biktima iti balay ni Salazar Escojido, kaduada ti sumagmamano a kalugaranda, inruar ni Querubin ti paltogna a homemade gauge 12 sana inted iti bumalay ngem insubli daytoy kenkuana.

Mapapati a gapu iti bartek ni Querubin, dinan ammo ti nangikabilanna iti paltogna ket sinuspetsana nga inlemmeng ni Vidal a puon ti panagsubangda ken nangbagsolan ti suspek iti biktima.

Nakarekobre dagiti nagresponde a polis iti maysa a patadem, homemade Gauge 12, ken lima a balana iti lugar a nakapasamakan ti pammagsol.#