NARVACAN, Ilocos Sur – Dati a susik ti mapapati a nakagapu iti pannakabagsol ti maysa a mannalon sadiay Zone 7, Barangay Camarao, ditoy nga ili idi rabii ti Oktubre 30.
Nabigbig ti biktima a ni Louie Carbero y Salo, 26, baro, mannalon idinto a nainaganan ti suspek a maysa a Nestor Cabatu, agpada a residente iti nadakamat a barangay.
Segun iti report, sakbay ti insidente, nagginum ti biktima ken ti suspek iti balay ni Danny Sape, kalugaranda.
Mapapati nga idi naggawid ti biktima, kellaat a nagparang ti suspek sana binagsol iti namitlo ti biktima a nagsagrapan daytoy iti sugat iti barukong ken tian.
Naitaray ni Carbero iti Central Ilocos Sur District Hospital idinto a sinapul dagiti polis ni Cabatu a naglibas kalpasan ti pammagkong, kuyogna ti patadem.
Dati a susik ti mapapati a ramut ti pammagkong.#