Mannalon, binagsolna nanggandat iti biagna

SALCEDO, Ilocos Sur – Binagsol ti maysa a mannalon ti maysa a lalaki a maatap a nanggandat iti biagna bayat ti panagpastorna iti tarakenna nga animal iti igid ti karayan idi agsapa ti Oktubre 17.

Nagresponde dagiti polis kalpasan a nakaawatda iti report manipud ken ni Barangay Captain ti Kaliwakiw Benigno C. Pascua nga adda napasamak a pammaltog ken pammagsol iti igid ti karayan ti Sitio Turod a sakup ti nadakamat a barangay.

Nasarakan dagiti polis ni Arnold Fabrigas y Valdez, 39, naasawaan, taga-Barangay Sampaloc, Talisay, Batangas ken agdama nga agnaed iti Barangay San Martin, Bacnotan, La Union nga awanen iti biagna ket nagsagrap kadagiti nakaro a sugat iti tianna a puon ti dagus a nakatayanna.

Segun iti inisial nga inbestigasion dagiti inbestigador, bayat ti panangipastor ni Bernardo Col-long y Aluyen, 51, naasawaan, mannalon ken residente iti Sitio Turod, Barangay Kaliwakiw ditoy nga ili iti tarakenna nga ayup, inasitgan ni Fabrigas a mapapati a nagpammarang a gumatang iti kalding ket mapapati a binunot ti naud-udi ti paltogna sana pinaputokan ni Col-long iti namindua a nagsagrapan daytoy iti rupana.

Bimmales ni Col-long ket binagsolna ni Fabrigas sa nagtaray a napan iti balay ti anakna a ni Carlos a nangibagaanna iti napasamak.

Nakarekobre dagiti polis iti abay ti natay iti maysa a petaka a naglaon kadagiti assorted a personal a dokumento, nangisit a holster ken maysa a magasin ti cal. 45 a nagkarga iti uppat a bala.

Saan a narekobre ti paltog a mapapati nga inkuyog ni Col-long iti panaglibasna.

Saan pay nga ammo ti motibo ti insidente.

Kabayatanna, napaltogan ti maysa a residente iti Barangay Estancia, Narvacan, Ilocos Sur ket ti mismo a kayongna ti naitudo a nanggandat iti biagna.

Naitaray iti Central Ilocos Sur District, Barangay Paratong, Narvacan ni Marilou Cabrera y Guzman, 35, naasawaan, ken residente iti nadakamat a barangay gapu iti sugatna iti padingpadingna a gapuanan ti panangpaltog kenkuana ni Melanio Cabrera y Buendia, 35, baro, mannalon ken kalugaranna met laeng.

Segun iti inisial nga inbestigasion dagiti polis, adda iti uneg ti pagtaenganna ni Cabrera idi pinaltogan ti kayongna babaen ti cal. 22 rifle.

Indatag ni Barangay Captain Ferdinand Tacla ti suspek kadagiti polis para iti pannakapalutpotna.

Saan pay nga ammo ti puon ti pammaltog.#