Mannalon, dinisnog ti kasinsinna

BURGOS, Ilocos Sur – Indarum ti maysa a mannalon ti kasinsinna iti panagbasakbasak ken physical injury kalpasan a saanda a nagsinnurot iti sanguanan ti barangay captain.

Indarum ni Mauro Vitales y Diaz, 60, naasawaan, ken residente iti Barangay Manaboc, ditoy nga ili, ti kasinsinna a ni Gerald Diaz, iti physical injury ken tresspass to dwelling ket naipila ti kaso iti provincial prosecutor’s office, Vigan City.

Sakbay daytoy, inreport ni Vitales iti polis a dinisnog ken binekkel ni Gerald Diaz bayat ti kaaddana iti pugonna idi agarup 5:30 ti malem ti Enero 30.

Mapapati nga imbalikas pay ti suspek ti: leche, patayenkan”.

Naiyamang ti problema iti barangay captain ngem saanda a nagsinnurot isu nga inkeddeng ti biktima nga agipila iti kaso.#