Footer

Mannalon, inur-uray ni patay ti panaggawidna

STA. CRUZ, Ilocos Sur – Inur-uray ni patay ti panaggawid ti maysa a mannalon iti taengna iti Barangay Amarao ditoy nga ili idi rabii ti Agosto 11.

Iti report a dimmanon iti polis ditoy, kasangsangpet ni Jerry Tubera, 56, residente iti nadakamat a barangay iti agarup alas 8:15 ti rabii ti Agosto 11 ket iluklukatna ti ruangan idi kellaat a pinaltopaltogan ti dua a lalaki a mapapati a nangpadaan kenkuana.

Nagsagrap ti biktima iti sugat iti barukong ken nadumaduma a paset ti bagina ket saanen a naidanon ti biagna iti Sta. Lucia District Hospital a nakaitarayanna.

Nangiwayat ti polis iti manhunt operation ngem didan nasapulan pay dagiti di pay nabigbig a suspek a naglibas iti amianan a direksion.

Kinuna ni Police Inspector nga adda anggulo a kitkitaenda a posible a motibo ti pammapatay ngem nagkitakit a mangibaga tapno saan a maunaan ti panagpalutpotda.

Nakarekobre dagiti inbestigador iti 7 a kapsula a nagtaud iti 9 mm ken 5 a kapsula ken maysa a buli manipud iti cal .45 iti nakapasamakan iti krimen.

Iti pannakaisurat daytoy, madama ti panagimbestiga dagiti polis mainaig iti nasao a pammapatay.

Itay laeng nabiit, iti miting a tinabunuan dagiti hepe ti polis dagiti nadumaduma nga ili ken ni Provincial Director Police Chief Supt. Eduardo Dopale, dinawat ti gobernador ti panangituloy ti PNP ti panangtagibenda iti linak ken talna iti sibubukel a probinsia tapno agtalinaed ti napintas nga imahe ti Ilocos Sur.#