Mannalon iti kamatis, napabulodan iti puonan

SANTA, Ilocos Sur – Mapabulodan dagiti agmulmula iti kamatis iti pagpuonanda a P45,000 iti tunggal ektaria a mulaanda, daytoy ti impakaammo ni Gov. Luis “Chavit” Singson bayat ti naisayangkat a dialogo kadagiti mannalon a naangay iti planta ti kamatis iti Barangay Mabilbila ditoy nga ili idi Oktubre 5.

Kadua ti gobernador a nakipagdialogo kadagiti nasurok 1,000 a mannalon da Vice Gov. Deogracias Victor Savellano, dagiti bokal, ken ni Nuccio Saverio, ti Italiano a mangmanehar iti panaglukat manen ti Ilocos Sur Tomato Paste Plant.

Napagnunumuan bayat ti dialogo a P2.50 ti paggatang ti planta iti tunggal kilo ti kamatis ken manayonan iti P.30 tunggal kilo no idanon dagiti mannalon ti produktoda iti planta.

Impasigurado ni Singson a mabayadan a dagus dagiti kamatis apaman a maideliber iti planta. Maikissayto metten ti pagbayad ti mannalon iti naipasublat kenkuana a puonan apaman a mabayadan ti maideliber a kamatisna.

Kinuna ti gobernador a paset daytoy ti panangsigurado ti gobierno probinsial nga addanto umdas a kamatis a maproseso iti planta apaman a mangrugi ti operasionna.

“Nasaysayaaten no dakayo ti mangidanon iti kamatisyo tapno malapdan ti parikut a kas idi napalpalabas nga insidir dagiti mannalon ti naladaw a pannakabunag dagiti kamatisda a gapu ti nakalunglungsotan dagiti produktoyo,” kinuna ti gobernador.

Impakaammo met ni Saverio nga aggapu sadiay Italia ti bukel a maiwaras kadagiti mannalon.  Masapul ti 400 a gramo ti bukel a maimula iti maysa ektaria ket umabot iti 50-70 a tonelada ti apiten iti tunggal ektaria..

Inwaragawag pay ni Singson a naibiahen sadiay Italia dagiti partes ti makina a nadadael tapno mapasimpa santo maisubli dagitoy sakbay ti panagburas ti kamatis a panaglukatto metten ti tomato paste plant.

Napagnunumuan nga inton Oktubre 11 ti pannakaited dagiti bukel ken pannakaiyawat ti maipabulod a gatad. Kasapulan met a bitbit dagiti mannalon ti ohas wenno titulo ti daga wenno autorisasion manipud iti makindaga (no makitaltalon) a pagibasaran iti kantidad a maipautang kadakuada.#