Mannalon, kinabil ti kabsat ti kalib-inna

VIGAN CITY – Dati a di panagkinnaawatan ti naitudo a ramut ti panangdangran ti maysa a trahabador iti kalib-in ti kabsatna a babai sadiay Barangay San Julian Norte ditoy nga ili idi rabii ti Hulio 27.

Naiyospital ni Rodner Jimenez Domingo, 17, baro, mannalon, ken residente iti nadakamat a barangay gapu iti panangidisnog ni Delmar Alones y Ramos, 25, naasawaan, construction worker, ti iggemna a bato iti makannawan a lapayagna.

Iti panagimbestiga dagiti polis, simmangpet a nabartek ni Alones, kabsat ti kalib-in ni Domingo, ket prinobokar ken kinaritna ti biktima nga agdinnisnogda.

Mapapati a kellaat lattan a dinarup ti suspek ti biktima sana indisnog ti iggemna a bato.

Saan a nailanad iti report no ania ti dati a susik dagiti dua.