Mannalon, linib-at a ginudas dua a lalaki

SINAIT, Ilocos Sur – Linib-at ni patay ti maysa a mannalon bayat ti panaggiinomda nga agkakadua iti Barangay Pacis ditoy nga ili idi rabii ti Abril 23.

Natay a dagus ni Ronito Lacuesta Salcedo, 46, baro, mannalon ken residente iti Barangay Calingayan ditoy nga ili gapu kadagiti sugatna iti nadumaduma a paset ti bagina.

Segun iti inbestigasion, aggiinom ti biktima, kaduana da Barangay Kagawad Santos Ines y David ken Noel Ines y David idi kellaat nga immasideg dagiti dua nga armado a tattao ket pinalpaltoganda ti biktima a nakatayanna nga insigida.

Nakarekobre dagiti nagresponde a polis iti crime scene ti 9 nga empty shells ken tallo nga slugs a naggapu iti carbine ken 5 a kapsula ken 1 a buli manipud iti cal .45.

Maysa a mannalon a mapapati nga adda nakainbolbaranna iti krimen ti inimbitaran dagiti polis iti police station.#