Mannalon, minalo ti tricycle driver

STO. DOMINGO, Ilocos Sur – Riri ti agkabagian ti puon ti nangkabilan ti maysa a tricycle driver iti kalugaranna a mannalon idi sardam ti Nobiembre 30 sadiay Barangay Pangpangdan ditoy nga ili.

Naireport nga idi agarup 7:20 ti rabii ti nadakamat a petsa, minalo ni Edgar Costales y Tabigne, 45, naasawaan, ni Marso Costales y Costales, 51, naasawaan, mannalon, agpada a residente iti nasao a barangay.

Iti panagimbestiga dagiti polis, sakbayna, nagriri da Ferdinand Costales y Natividad, 27, baro, construction worker ken ni Loida Costales y Tabigne, 35, awanan asawa, Jolibee employee ket mapapati a pinang-or ni Loida iti kayo ti takiag ni Ferdinand.

Napan inanawa ni Edgar dagiti dua ngem dinarup ni Marso a nakaiggem iti bolo. Nupay kasta, naagaw ni Francisco Mimming, chief tanod, ti bolo.

Mapapati a pimmidut ni Edgar ti maysa a natangken a banag ket immalona iti ulo, tengnged ken likud ni Marso.

Agpada da Edgar ken ni Marso a naitaray iti Magsingal District Hospital sa kalpasanna, naipan ni Edgar iti police station para iti umisu a disposision.#