Mannalon, nadismayada kabassit pakpakauna a bayad ti kamatisda

VIGAN CITY – Nadismaya dagiti mannalon iti kabassit ti pakpakauna a bayad dagiti apitda a kamatis iti baet a nabayagen a nalakoda.

Inyawat ti gobierno probinsial dagiti pakpakauna a bayad dagiti kamatis nga inlako dagiti mannalon iti Tomato Paste Plant idi pay la kanikadua a tawen iti provincial capitol hall itay Mayo 6.

Saan a nababbaba ngem P2,000 ti naited a partial payment iti apit a kamatis dagiti mannalon manipud iti Sinait, partikular iti Barangay Nagbalioartian, Aguing, Duyayyat, Pacis ken Teppeng, kasta met iti Cabugao, San Juan ken sumagmamano nga ili iti segundo distrito.

Ngem sumagmamano a mannalon ti nangipeksa iti pannakadismayada iti kabassit ti pakpakauna a bayad ti kamatisda idinto a nabayagen a nalakoda dagiti apitda iti Tomato Paste Plant.

Agdagup iti P8 milion ti utang ti Tomato Paste Plant kadagiti agmulmula iti kamatis, P 3 milion kadagiti mannalon iti Ilocos Sur ken P5 milion kadagiti agmulmula iti Ilocos Norte.

 Segun iti maysa a dadaulo dagiti mannalon, aganay a P10,000 ti average a singsingiren tunggal mannalon a bayad ti kamatisda.

Idi Pebrero daytoy a tawen,  personal a nagpatulong dagiti agmulmula iti kamatis manipud iti sumagmamano nga ili iti probinsia iti gobierno probinsial tapno mabayadan ti apitda a kamatis nga inlakoda iti Tomato Paste Plant idi pay la 2006-2007 a panagkakamatis.

Kasta met nga aganay a 50 a mannalon ti timmabuno iti provincial capitol para iti pannakidialogoda iti mangimatmaton iti planta ngem  awan ti binanagda gapu ta awan ti nagparang a pannakabagi ti planta.

Ni Vice Gov. Jerry Singson ti simmango kadagiti mannalon agsipud ta saan a nakatabuno ni Manager Madeline Arce ket  kinunana a tumulong ti hunta probinsial kadagiti mannalon para iti pannakabayad dagiti kamatisda ken dagiti empleado ti planta a di nasuelduan.

Naammuan pay ti hunta probinsial a tallo bulan a sueldo ti saan a naited kadagiti empleado ti nasao a planta ken mapapati a saan a nabaybayadan ti premiumda iti Philhealth Insurance, SSS ken Pag-ibig idinto a binulan met a maik-ikkatanda tunggal sueldoda.

Impasingked ni Gov. Deogracias Victor Savellano kadagiti mannalon nga ikarigatan ti gobierno probinsial ken ti Tomato Paste Plant a mabayadan iti kabiitan a tiempo dagiti kamatis nga inlakoda iti planta. (Karaman ti report ni Nemia Icari)