Mannalon, nadungpar, natay

TAGUDIN, Ilocos Sur – Natay ti maysa a mannalon kalpasan a dinungpar ti maysa a lugan sadiay Barangay Becques, ditoy nga ili idi rabii ti Marso. 13.

Pimmusay iti ospital a nakaitarayanna ni Reymundo Agas y Mendoza, 34, mannalon, ken residente iti nadakamat a barangay.

Mapapati nga arayaten koma ni Basilio Rarugal y Gallepusa, 43, ken residente iti Barangay Balaleng, Bantay, Ilocos Sur a a nagmaneho iti Isuzu Forward a nakadungpar kenkuana ngem pinakaskasnan ti luganna idi makitana nga adda mapapati a mangkamat kenkuana ngem natiliw dagiti nagresponde a polis-Tagudin sakbay a makadanon iti Sudipen police station a nagtarayanna a sumukuan.

Iti panagimbestiga dagiti polis, agpaabagatan ti Isuzu Forward a nagkarga kadagiti muebles idi mapapati nga aksidente a nadungparna ni Agas a madama nga agbalballasiw nga agpalaud a direksion ket naipuruak ti biktima iti akinlaud nga abaga ti kalsada.

Nagsagrap ti biktima kadagiti sugat iti ulo, barukong ken nadumaduma a paset ti bagina ket naitaray iti Ilocos Sur District Hospital, Barangay Bio, Tagudin ngem pimmusay bayat ti pannakatamingna.

Saan a naan-ano da Rarugal ken dagiti tallo a pahinantena.

Napagsubli ti Isuzu Forward iti Tagudin police station para iti umisu a disposision.#