Mannalon nagbekkel gapu ta napabasol a nagtakaw iti irik

STO. DOMINGO, Ilocos Sur – Mapapati a dinemdem daytoy a mannalon ti pannakapabasolna a nagtakaw iti sangasako nga irik ket nagbekkel iti uneg ti balayda sadiay Barangay Pangpangdan, ditoy nga ili idi bigat ti Disiembre 17.

Segun iti report manipud iti polis ditoy, sakbay ti panagbekkelna, pinanawan dagiti kabbalayna ni Dominador Garo y Rabago, 29, baro, mannalon, nga umin-inom iti gin iti balayda.

Kas maibatay iti report, nakita ni Jobin Barcena y Garo, 3, kaanakan ti biktima, a nagbekkel ni Garo iti uneg ti balayda ket imbagana ti insidente iti inana a ni Avelina Barcena y Garo, 31, kabsat ti biktima, ken residente met laeng iti nadakamat a barangay.

Iti panagimbestiga ti polis, nagbekkel ni Garo babaen ti panangipulipolna ti nylon cord iti tengngedna, inggalutna iti kawayan iti bubong ti salasda sa nagbitin.

Kinuna met ni John Mar Barcena, 13, a naisalpika ti ulitegna a kettelenna ti biagna agsipud iti pannakapabasolna a nagtakaw iti sangasako nga irik iti balay ti ulitegna a ni Mariano Rabanal.#