Mannalon, nagpakamatay

STA. CATALINA, Ilocos Sur – Depresion ti mapapati a gapu iti pananggibus iti maysa a mannalon iti biagna idi agsapa iti Peb. 22, daytoy a tawen.

Nasarakan nga awanan biag ni Eduardo Ragasa y Custodio, 49, naasawaan, mannalon, ken residente ti Sitio Punta, Brgy. Cabittaogan, daytoy nga ili, gapu iti tama ti Cal. 22 a paltog iti ulona. Ti awanan lisensia a paltog ket nasarakan iti abay ti biktima ken kukua ti pimmusayen nga amana.

Kuna ti asawa ti biktima a manipud pay idi Enero daytoy a tawen, kanayon a ma-ospital ni Ragasa gapu iti ulaw ken high blood. Sinao kano ti biktima a saanna kanon a maibtoran ti sakitna ket kayatnan ti matay.

Iti sabali met a disso, nasarakan ti bangkay ni Felix Berto Vallangca y Lucrecio, 55, naasawaan, mannalon, residente ti Brgy. Darao, San Juan, Ilocos Sur, a nabagbagsol iti talonda iti kabanbantayan a paset ti Sitio Naguludan, Brgy. Darao.

Kuna ti anak a babai ti biktima a nagpaarayat kadagiti kabagianda a biroken ti amana idi saan a simmangpet idi rabii ti Peb. 22. Napanda binirok iti bantay ket ditan a nasarakanda ti bangkayna a nabagbagsol.

Saan pay nga ammo no ania ti motibo ti pammapatay ken no asino dagiti kriminal. (Tawid News Team)