Mannalon, nagpatulong iti hunta probinsial tapno mabayadan inlakoda a kamatis iti Tomato Paste Plant

VIGAN CITY – Agingga ita, adda dagiti mannalon a di pay nabayadan ti apitda a kamatis nga inlakoda pay idi kanikadua a tawen iti Tomato Paste Plant.

Personal a nagpatulong dagiti agmulmula iti kamatis manipud iti Sinait, Ilocos Sur kadagiti kameng ti sangguniang panlalawigan bayat ti panagsession dagitoy itay Pebrero 27  para iti pannakabayad ti kamatisda nga inlakoda iti Tomato Paste Plant iti tomato season idi kanikadua pay a tawen.

Kinuna ni Berto Fiesta, dadaulo dagiti agmulmula ti kamatis, a 30 porsiento pay laeng ti nabayadan kadagiti inlakoda a kamatis iti Tomato Paste Plant nga apitda pay la idi 2006-2007.

Kinuna dagiti mannalon a nasurok a P259, 000.00 pay ti saan a nabayadan ti management iti Tomato Paste Plant.

Kinunada a daytoy a gatad ti utang ti nasao a planta kadakuada laeng nga agindeg iti Brgy. Nagbalioartian, Sinait, Ilocos Sur.

Segun pay dagitoy a mannalon, adda pay  dagiti saan a nabayadan iti kabangibangda a barbarangay.

Kanaig daytoy, kinuna ni Vice Gov. Jerry Singson a kasapulan ti pannakapaayab ti manager ti planta tapno lawlawaganna no apay a saan pay a nabayadan dagiti mannalon idinto nga insingasingna ti pananganamong ti hunta probinsial iti supplemental budget tapno mabayadan dagiti mannalon.

Iti panangkontrada iti singasing ti bise gobernador, kinuna da Bokal Zuriel Zaragosa, Bokal Ronnie Rapanut ken Chairman ti Appropriation Bokal Chuchi Purisima a saan a rebbengen a bayadan ti provincial government ti utang ti Tomato Paste Plant kadagiti mannalon agsipud ta komersial daytoy  idinto nga impalagipda  a babaen ti nagpinnirmaanda a memorandum of agreement, nangilatang ti gobierno probinsial iti tulong pinansial para iti pannakaipataray ti   pasdek-negosio.

Tapno masolbar daytoy a problema, napagtitinongan a maisayangkat inton Marso 5 ti maysa a dialogo iti nagbaetan dagiti agmulmula iti kamatis, ni Madeline Arce,  mangimaton iti Tomato Paste Plant, ken dagiti board members.#