Mannalon, nagudas iti panangtambang lallaki a riding in tandem

SINAIT, Ilocos Sur – Maysa manen ti ginudas dagiti armado a tattao a riding in tandem iti Barangay Binacud ditoy nga ili idi rabii ti Hunio 4.

Maysa a report manipud ken ni Barangay Captain Judymar Ilar y Ramos ti simmangpet iti police station ditoy nga ili a maysa a Renato Yaba, Jr. y Cadimas, 32, naasawaan, mannalon ken residente iti Barangay Ubbog ti ginudas dagiti di nabigbig a tattao a nagkalubbon iti motorsiklo idi agarup 10:46 ti rabii ti nadakamat nga aldaw.

Iti panagimbestiga dagiti polis, naammuan nga agdaldaliasat ti traysikel a minaneho ti biktima iti barangay road iti dayta a rabii, pasaherona ti  asawana a ni Primalyn, 35, ken dagiti dadakkelna a da Renato, Sr., ken ni Carmelita, idi pinaltogan ti dua a tattao a naglugan iti saan nga ammo ti kitana a motorsiklo manipud iti likudan.

Nagsagrap ti biktima iti sugat iti makannigid a pispisna a puon ti nakagudasanna a dagus.

Nakarekobre dagiti polis iti maysa a kapsula ti bala manipud iti cal. 45 iti nakapasamakan ti krimen.

Madama ti panagimbestiga dagiti polis no ania ti motibo ti nasao a pammapatay.

Kabayatanna, kiniddaw dagiti polis ti Vigan City iti ISCIDT, Bulag, Bantay, Ilocos Sur ti pannakaaramid ti carthographic sketch ti suspek iti pannakapapatay ti maysa nga inhiniero ti Department of Public Works and Highways ken residente iti Barangay San Pedro Norte, Vigan City idi rabii ti Hunio 2 iti uneg ti Venini Store a masarakan iti Liberation Boulevard, Vigan City.

Iti follow-up investigation nga insayangkat dagiti polis, nakasarakda kadagiti saksi a mapapati a nangiladawan iti suspek.

Pinaltogan ti di pay nabigbig a lalaki iti namitlo a beses ni Reotutar bayat a  katugawna ti live-in partnerna a ni Delfina Aguimbag y Alibaya, 53, balasang, ken residente iti Barangay VIII, Vigan City iti uneg ti nasao a pagtagilakuan.

Naitaray ti biktima iti Gabriela Silang General Hospital ngem naideklara a natayen gapu iti sinagrapna a sugat iti ulona.

Mapapati a naglibas ti suspek a nagnagna iti amianan a direksion iti Del Pilar Street.

Nakasarak dagiti polis iti tallo a kapsula ken maysa a buli manipud iti cal. 45 iti crime scene.#