Mannalon, nagudas iti pannambang

VIGAN CITY – Ti kasona iti napalabas ti maysa nga anggulo a kitkitaen dagiti inbestigador ditoy mainaig iti pannakapapatay ti maysa a karpintero/mannalon idi agsapa ti Agosto 24.

Mapapati a sumangsango iti kaso a frustrated murder  ni Gomercindo Aquino y Aragoza, 57, naasawaan, ken residente iti Barangay Bulala, ditoy siudad ket daytoy ti kitkitaen dagiti inbestigador no adda pakainaiganna iti pannakapapatay ti biktima iti Sitio Quimmabeng, Barangay Bulala .

Iti inisial nga inbestigasion dagiti polis, agdaldaliasat nga agpaamianan ni Aquino iti nadakamat a sitio a nakasakay iti Yamaha Mio a motorsiklona idi pinaltogan dagiti di pay nabigbig a suspek a nagsagrapanna kadagiti sugat iti nadumaduma a paset ti bagina a puon ti nakatayanna a sigida.

Mapapati a mapan koma sukonen ni Aquino ni Paulita Espejo y Espiritu, 45, kalib-inna ken residente iti Barangay Mindoro ditoy met laeng siudad idi mapasamak ti pammapatay.

Segun kadagiti lumugar iti asideg ti nakapasamakan ti krimen, nakangegda kadagiti nagsasaruno a putok ngem saanda a rimmuar.

Maysa a concerned citizen ti nagtelepono iti police station ket inreportna ti pammaltog.

Nadatngan dagiti nagresponde a polis ti biktima a nadigos iti bukodna a dara ken awanen ti biagna.

Naipan ti biktima iti Holy Angel Funeral Homes iti Ayusan Norte para iti pannakautopsiana.

Iti panagimbestiga ti SOCO team manipud iti ISPPO nga indauluan ni Police Supt. Danile Dingle Coronel, nakarekobreda iti tallo a kapsula ti cal. 45 ken 6 a basyo ti M16 iti nakapasamakan ti krimen.

Nakarekobre pay dagiti inbestigador iti ikut ti biktima ti maysa a bolo nga agatiddog iti sumurok-kumrang 15 a pulgado ken dadduma pay a ramitna.#