Mannalon, naiwalang iti kataltalonan

MAGSINGAL, Ilocos Sur – Maysa a bangkay a mapapati a naiwalang ti nasarakan iti kataltalonan iti Sitio Danglas, Barangay Labut, ditoy nga ili idi agsapa ti Mayo 1.

Nabigbig ti bangkay a ni Eusebio Virtudes y Soliven, 49, naasawaan, mannalon ken residente iti Sitio Kariskis,  Barangay Labut.

Nagsagrap ti biktima kadagiti bagsol iti bagi ken ulona ket naipan iti Saint Michael Funeral Homes para iti pannakautopsiana.

Iti panagimbestiga dagiti polis, napan ni Virtudes iti pagtaengan ni Edgardo Pido iti nadakamat a barangay ket naggiinomda kada Danny Rocero, Marlon Casta├▒eda, Robert Tica, ken Mark Anthony Bosque, agpapada a residente met laeng iti nadakamat a barangay.

Mapapati a pimmanaw ti biktima iti naggiinomanda idi agarup alas 9:30 ti rabii ti Abril 30 ngem nasarakan laengen a naiwalang a nabagbagsol iti kabigatanna.

Inimbitaran dagiti polis dagiti nakainoman ni Virtudes sakbay a nasarakan a naiwalang malaksid ni Casta├▒eda a saanda a mabirokan.

Iti pannakaisurat daytoy, sapsapulen pay laeng dagiti polis ni Casta├▒eda.#