Mannalon, naiwalang iti pagpastoran

CERVANTES, Ilocos Sur – Napanna la pinasiar dagiti pastorna nga animal ngem saanen a nakasubli pay a sibibiag.

Nagreport ni Michael Abraham, legal nga edad, ken residente iti Barangay Concepcion, ditoy nga ili a nasarakanna ti amana a ni Mario Abraham y Sotto, 46, naasawaan, mannalon, ken residente met laeng iti nadakamat a barangay, a napaltogan iti Sitio Salinkob, Barangay Concepcion.

Intaray dagiti nagresponde a polis ti biktima iti Bessang Pass Memorial Hospital ngem naideklara a dead on arrival gapu kadagiti nadumaduma a sugatna.

Iti panagimbestiga dagiti polis, immulog ti biktima iti balayda iti agarup 12:30 ti malem iti nadakamat a petsa tapno mapanna kitaen dagiti pastorna nga animal ngem idi saan metten nga aggawid, napan sinukon ni Michael idi agarup 1:50 ti malem ngem nadatnganna a nakadalutaytayen ti amana iti daga a nadigos iti bukodna a dara.

Nakarekobre dagiti polis iti buli a mapapati a naggapu iti paltog a di pay ammo ti kalibrena iti pagan-anay ti biktima ket daytoy ti naipan iti Candon City Crime Lab para iti pannakaamirisna.

Mapapati a panagtakaw ti motibo ti pammapatay ta awan ti kuarta ti biktima a P20,000.00 a mapapati nga intaray dagiti di nabigbig a suspek.#