Mannalon, naiyanud, nalmes

SALCEDO, Ilocos SurNaballakadan daytoy biktima a saan nga agballasiw iti karayan agsipud ta napegges ti agus ngem di nangipangpangag. Resulta, saanen a nakaawid ta naiyagus a puon ti nakalmesanna.

Iti report manipud iti police station ditoy, naiyanud ni Elpidio Roldan y Cuplang, 66, naasawaan, mannalon ken residente iti Barangay Bulala, ditoy nga ili bayat ti panagballasiwna iti Buwaya River a puon ti nakalmesanna .

Nasarakan ni Edlan Batin y Lacaden, 35, naasawaan, residente iti nadakamat a lugar, a naipanget ti bimsog a bangkay ni Roldan iti kabatuan a paset ti karayan idi mapan agipakat iti bukatot idi malem ti Agosto 30.

Sakbayna, iti nasapa a bigat ti Agosto 29, napan minasahe ni Roldan ti maysa nga agnagan Bong Bong ket aggawiden iti balayda idi binagaan ni Dante Lancao ti biktima  a saan nga agballasiw iti karayan agsipud ta napegges ti agus ket magna laengen iti hanging bridge ngem limtuad a saan nangitaltalek.#