Footer

Mannalon, nakabil iti natayan

NAGBUKEL, Ilocos Sur – Argumento nga ad-adda a pinabara ti arak ti ramut ti pannakakabil ti maysa a lalaki iti natayan sadiay Barangay Mission, ditoy  nga ili idi rabii ti Octubre 20, 2013.

Segun iti report manipud iti police station ditoy, kinabil da Ernesto Quiray y Cachola, taga-Barangay Balaweg, Nagbukel ken maysa nga Amboy, a.k.a. “Pittakong”, taga-Sitio Ambakul, Dasay, ditoy met laeng nga ili, ni Jojo Corrales y Asana bayat ti kaaddada iti maysa a natayan idi agarup 10:15 ti rabii ti nadakamat nga aldaw.

Mapapati a naaddaan iti nabara nga argumento iti nagbaetan da Amboy ken Quiray ken ni Corrales ket kinabil dagiti suspek ti  biktima a nagsagrapan daytoy iti dunor iti rupana.

Intaray dagiti nagresponde a polis ni Corrales iti Central Ilocos Sur District sa naiyalis daytoy iti Gabriela Silang General Hospital, Vigan City para iti pannakaagasna.

Naglibas dagiti suspek kalpasan ti panangkabilda iti biktima.

Mapapati a nakainom dagiti suspek ken biktima idi naparnuay ti nabara nga argumentoda.#