Footer

Mannalon, nakimat; DOA iti ospital

CABUGAO, Ilocos Sur. Awanen ti biag ti maysa a mannalon idi maidanon iti ospital kalpasan ti pannakakimatna idi malem ti Hunio 28.

Naitaray iti Pira Clinic and Hospital, Cabugao ni Terenal Antoc y Sambrano, 44, naasawaan, mannalon, ken residente iti Barangay Namruangan, ditoy nga ili, ngem indeklarar ti doktor a nangtaming kenkuana a dead on arrival.

Limtuad iti inbestigasion a mangruruot ni Antoc iti kataltalonan idi kellaat a nagkanabsiit ti kimat a mapapati a nakasaplidanna idi agarup 4:00 ti malem ti nadakamat a petsa a puon ti nakatayanna.

Iti sabali a damag, nagasgasat ti maysa a tanod ta nupay naaplawan ti kimat idi malem ti Hunio 28, nagsagrap laeng iti minor burns ket nabaelanna a minaneho ti traysikelna sa nagpaarayat.

Naitaray ni Elpidio Tamayo, Jr. y Dumalanta, 54, naasawaan, federated chief tanod, ken residente iti Barangay Macaoayan, Burgos, Ilocos Sur, iti Ilocos Sur District Hospital, Narvacan, Ilocos Sur ket agpapaimbag iti nasao nga ospital.

Kas maibatay iti report, nupay napigsa ti bayakabak, agdadaraddan ti gurruod ken agkimatkimat, napan kinita ni Tamayo ti nakawayway a kaldingna iti talon idi agarup 5:00 ti malem ti nadakamat a petsa.

Mapapati a nagkanabsiit ti kimat ket naaplawan ni Tamayo a nakaladamanna. (Tawid News)