Footer

Mannalon, nakoriente iti kataltalonan

STO. DOMINGO, Ilocos Sur – Nakoriente ti maysa a mannalon idi apanna iyalis iti pagaraban dagiti tarakenna a baka idi Hunio 11 iti agdama a tawen.

DOA iti Northside Doctor’s Hospital ni Haji Tabisula y Fontejon, 40, naasawaan, mannalon, agnaed iti Brgy. Camestisoan, daytoy nga ili, idi apanna iyalis iti pagaraban dagiti tarakenna a baka, idi napan a lawas, gapu iti aksidente a pannakadalapusna iti nakulislisan a barut ti koriente iti dalanna.

Iti inbestigasion dagiti nagresponde a polis ti Sto. Domingo Police Station, nakitada a ti nakulislisan a barut ti koriente iti nakapasamakan ti aksidente ket naggapu iti balay ti agnagan Ernesto Poca agturong iti warehouse iti talon a kukua met ti agnagan Roxan Papagayo, residente ti Brgy. Vacunero daytoy nga ili. Saan a naiwayat a nasayaat ti barut ket nagdisso iti daga a puon ti nakapasamakan ti aksidente. (Tawid News Team)

2 a menor de edad, nalmes

VIGAN CITY – Nalmes ti dua nga ubbing idi Hunio 12 daytoy a tawen iti puttot a masarakan iti Brgy. Ayusan Norte daytoy a siudad idi napanda agala iti bisukol ken uggot ti balangeg.

Saanen a naalaw ti biag da Andrei Bongolan Bañez, 7, Grade 2, ken Jessie Bribon, 13, agpada a residente ti Brgy. Pantay Fatima daytoy a siudad, iti St. James Hospital a nakaitarayanda.

Iti inisial nga inbestigasion, napan dagiti biktima ken tallo pay a kaduada idiay Ayusan Norte tapno agala iti bisukol ken balangeg iti maysa a puttot. Ditoyda a nalmes ta nauneg ti puttot ken dida met siguro ammo ti aglangoy.

Da Jeffrey Quindipan Quiacusan, 34, addaan asawa, agnaed iti Brgy. Villamar, Caoayan, Ilocos Sur, security guard, ken Anthony Robinacion Rebolete, 30, addaan asawa, taga-Brgy. San Isidro, San Juan, Ilocos Sur, drayber ti Two Brothers Warehouse, dagiti na-
ngalaw kadagiti biktima

Intaray dagiti nagresponde a polis ti Vigan City Police Station dagiti biktima iti ospital ngem idineklara a DOA dagitoy ti doktor a nangawat kadakuada. (Tawid News Team)