Mannalon, nakoriente, natay

NARVACAN, Ilocos Sur – Naideklara a dead on arrival ti maysa a mannalon iti ospital a nakaitarayanna gapu iti pannakakorientena bayat ti panagsibogda iti mais iti talonda sadiay Barangay Sucoc ditoy nga ili idi agsapa ti Pebrero 8.

Nabigbig ti biktima a ni Roderick Cabanting y Cabreira, 38, awanan asawa ken residente iti nadakamat a barangay.

Kas maibatay iti palawag ni Aurelio Cabanting, Jr. y Cabreira, kabsat ti biktima, agsibsibugda iti mais iti talon idinto a tartarimaanen ni Roderick ti nakaliskisan a barut ti koriente.

Mapapati nga aksidente a naiggaman ti biktima ti nakalukais a barut a puon ti nakakorienteanna.
Intarayda ni Roderick iti Ilocos Sur District Hospital, Narvacan ngem saandan a naidanon a sibibiag pay.#