Footer

Mannalon, nalmes bayat panagkalapna

SANTA, Ilocos Sur – Tallo nga oras sakbay a nasarakan ti bangkay ti maysa a mannalon a napan nagkalap iti karayan ti Abra, iti laud ti Barangay Mabilbila Sur ditoy nga ili idi agarup 5:30 ti malem ti Hunio 26.

Naitaray ni Melvin Rubio y De Peralta, 36, ken residente iti nadakamat a barangay ngem indeklara ti doktor a nangtaming kenkuana nga awanen ti biagna.

Segun iti panagimbestiga dagiti polis, napan nagala iti bennek ti biktima, kaduana ti dua a kabsatna ken dadduma pay a kakaduana iti nadakamat a karayan ket idi agarup 2:30 ti malem iti dayta met la a petsa, nagpatengnga ti biktima iti karayan tapno agkalap ngem mapapati a nagbetted a puon ti nakalmesanna.

Nangiwayat dagiti miembro ti Ilocos Sur PDRRMO ken MDRRMC iti search and retrieval operation ket naalawda ti bagi ti biktima idi agarup 5:30 ti malem.#