Mannalon, nalmes bayat ti panagkalapna lames a piknikenda

SINAIT, Ilocos Sur – Napanda nagkalap bayat ti panagpipiknikda tapno adda kanayon ti pangaldawda ngem isu metten ti nakalmesan ti maysa.

Naitaray ni Nestor Rosete y Cainglit, 46, mannalon ken residente iti Barangay Cabarambanan, Sinait, Ilocos Sur, iti Corpuz Clinic and Hospital ngem naideklara nga awanen ti biagna idi naidanon iti nasao nga ospital.

Segun iti asawa ti biktima, idi agarup 8:00 ti agsapa ti Hunio 23, napanda nga agkakabagian nagpiknik iti Barangay Cabangtalan.

Idi agarup 10:00, nagkuyog a napan nagkalap babaen iti iket ni Rosete ken ti kaanakanna a ni Albert Acebedo y Villa, 31, ken residente iti nadakamat a barangay ket ditoy metten a nalmes ti biktima.

Saan a nadakamat iti report no kasano a nalmes ni Rosete.#