Mannalon, napaltogan iti videokean

NARVACAN, Ilocos Sur – Maysa a mannalon ti pinaltogan ti kalugaranna iti uneg ti maysa a videokean ditoy nga ili idi rabii ti Septiembre 27.

Intaray dagiti nagresponde a polis ni Reynaldo Cabelina, Jr. y Coronado, 38, naasawaan, mannalon, ken residente iti Barangay Silang ditoy nga ili,  iti Central Ilocos Sur District Hospital tapno maagasan dagiti sugatna iti makannawan nga abagana gapu iti panangpaltog kenkuana ni Ronald Montero, kalugaranna met laeng.

Naammuan iti inisial nga inbestigasion a napan ni Coronado iti balay ni Virginia Supnet a nakaangayan iti inuman ken panagkakanta babaen ti videoke dagiti dimmar-ay iti kasangay ni Michael Supnet.

Mapapati nga apagkita ni Montero iti biktima, dagus a timmakder, kinumpronta daytoy sana pinaltogan a nakapuntaan iti makannawan nga abaga ti biktima.

Pinagtalna da Michael Supnet ken Crisanto Supnet ti suspek ket naikkan iti gundaway ti biktima a nagtaray  nga immadayo.

Pinakamatan ni Montero a paltogan ti biktima ngem dina napuntaan.

Naglibas ti suspek kalpasan ti pammaltog, kuyogna ti paltogna.

Nakarekobre dagiti polis iti uppat a kapsula manipud iti cal. 45 iti nakapasamakan ti pammaltog.

Di pay ammo ti motibo ti pammaltog.#