Mannalon, napaltoganna ti gurongna

BURGOS, Ilocos Sur – Maysa a mannalon ti naireport a nakapaltog iti bagina sadiay Barangay Manaboc, ditoy nga ili idi rabii ti Abril 10.

Napaltogan ni Mario Sison y Bier, 46, naasawaan, ken residente iti nadakamat a barangay, ti gurongna bayat ti panangpadasna a mangikkat iti bala ti homemade paltik, cal. 22 revolver) a napidut dagiti kaanakanna.

Nasarakan da Edmar Sison y Divina, 26, ken Ruben Reyes y Calibuso, 34, ti nasao a paltog iti dalan ket intedda iti biktima tapno agkukuyogda a mangisuko iti barangay captainda.

Ngem pinadas ni Sison nga ikkaten ti bala ti paltog ket aksidente a nanalbuong a nakatamaan ti makannigid a gurongna.#