Footer

Mannalon, napapatay iti pagginoman

NARVACAN, Ilocos Sur – Mapapati a panagtakaw ti motibo ti pannakapapatay ti maysa a mannalon iti maysa a paggiinoman sadiay Barangay Sta. Lucia ditoy nga ili idi rabii ti Nobiembre 19.

Saanen a naiyabot iti Central Ilocos Sur District Hospital ti biag ni Euloterio Cabotage y Cabotage, 54, naasawaan, mannalon, ken  residente iti Barangay Aquib ditoy nga ili.

Sakbayna, naggiinom da Cabotage, ti anakna a ni Gerald, 31, naasawaan,  ken dadduma pay a kabagianda iti De Chaves Store. Mapapati a sinurot ti nabigbig a suspek ti biktima idi napan daytoy immisbo tapno takawanna. Ngem mapapati a nakiranget ni Cabotage ket inasutna ti balisongna sana binagsol ti suspek. Inasut met ti suspek ti paltogna sana pinaputokan  iti namitlo ti biktima a nakatamaan ti tengngedna.

Naglibas ti suspek iti saan nga ammo a direksion.

Nakarekobre ti SOCO team manipud iti ISPPO iti tallo a kapsula manipud iti cal. 9 mm ken 2 a deformed slugs.

Awanen ti kuarta ti biktima a sumurok kumurang P5,000.00 a mapapati a kinurimes ti suspek.#