Footer

Mannalon, naragsakanda iti pannakaingato floor price ti tabako

BANAYOYO, Ilocos Sur – Naragsakan dagiti agmulmula ti tabako ditoy iti dakkel a ngimmatuan ti floor price daytoy a produkto kas napag-aanamongan iti tripartite consultative conference a naangay iti National Tobacco Administration itay nabiit.

Impalgak ni Josefina Orpilla, municipal agriculturist, nga ad-adu latta kadagiti mannalon ti agmulmula iti tabako ditoy no maikumpara iti mais ken mani.

“Tabako ngamin ti kangrunaan a maimulmula ditoy iti second cropping season,” kinuna ni Orpilla idinto nga innayonna a  padpadasenda pay a maikalawa ti mamulaan iti mais ken dadduma pay a crops ta ti nagastos ken makabannog pay ti agmula iti tabako.

Kinuna ni Orpilla nga insingasing ti mayor nga ilawlawada ketdi ti mulaanda iti tabako agsipud ta kadakkelan a pagtaudan ti pundo para kadagiti nadumaduma a proyekto ti ili ket manipud iti bingay ti munisipio iti R.A. 7171.

Agdagup iti 40% ti bingay ti munisipio iti excise tax ti sigarilio kas intuding ti R.A. 7171. Sag-30% ti mapan iti probinsia ken iti distrito.

Kinuna ni Orpilla nga iti agdama, aganay a 15 nga ektaria ti namulaan iti mais,  2 nga ektaria iti mani, ken 500 nga ektaria a kataltalonan ti namulaan iti birhinia.

Maipalagip nga iti kalkalpas a tripartite meeting, nga inatenderan dagiti mannalon babaen ti panangidaulo da Cong. Eric Singson ken Gov. Deogracias Victor “DV” Savellano, naaprobaran ti P10 a ngumatoan ti floor price ti tabako.

Kabayatanna, naisayangkat ti programa a Kakailian Nga Agnaed iti Barangay, Sangsangkamaysa nga Agrang-aytayo (KABSAT) babaen ti panagsangaili ti Barangay Kilang ditoy nga ili.

Walo a barangay ditoy ti nabenepisiaran iti nasao a programa a pakairamanan ti Kilang, Bitong, Bidbiday, Abaya, Sabangan Bato, San Vicente, Baracbac, ken Mabayag.

Nagtitipon ditoy dagiti  nadumaduma nga ahensia ti gobierno a nangipaay iti serbisio kadagiti umili agraman ti pannakaisayangkat ti   medical-dental mission ken panakaited iti libre agas kadagiti pasiente babaen ti tulong ti Madrigal Foundation.#