Mannalon, nasarakan a bangkay iti kalapaw

NARVACAN, Ilocos Sur – Napan nakiinom daytoy mannaloniti pabuniag ngem nasarakan metten a bangkay iti maysa a kalapaw iti asideg ti balayna iti kabigatanna.

Iti report manipud iti polis ditoy, naduktalan iti uneg ti maysa a kalapaw, sumurok kumurang duapulo a metro manipud iti balayna, ni Val Laya y Panem, 45, naasawaan, mannalon ken residente iti Barangay Nanguneg, Narvacan.

Iti inisial nga inbestigasion, napan dimmar-ay ni Laya, kaduana ti anakna a ni Princess idi agsapa ti Oktubre 4.

Iti dayta met la a malem, naggawid ni Princess ngem nagbati ti amana ket nakiinninom.

Mapapati a saan a nadlaw ti ni Maritess, asawa ni Laya, no ania nga oras a simmangpet ti lakayna manipud iti napanna nakibuniagan agingga a nasarakan a maysan a bangkay iti agsapa ti Oktubre 5.

Iti kaudian a report, naammuan nga awan ti foul play a napasamak ni Laya.#