Mannalon, natambang, grabe ti kasasaadna

MAGSINGAL, Ilocos Sur – Panagibales ti kitkitaen dagiti polis a motibo iti pannakapaltog ti maysa a mannalon sadiay Barangay San Ramon idi aldaw ti Hunio 23.

Kinuna ni Chief of Police Lucio Disierto, Jr. a kitkitaenda ti anggulo a panagibales a kas motibo iti pannakapaltog ni Marcelino Ullero, 37, naasawaan, ken residente iti Sitio Baybayabas, Barangay Maas-asin ditoy nga ili.

Mapapati nga adda dagiti kaso ti pammaltog a nakainbolbaran ni Ullero iti kallabes ket kitkitaen dagiti polis no adda pakainaigan dagitoy iti pannakapaltogna.

Iti pannakaisurat daytoy, adda iti grabe a kasasaad ni Ullero iti nakaitarayanna nga ospital.

Pinaltogan dagiti di pay nabigbig a suspek a nagkalubbon  ni Ullero bayat ti panagdaliasat ti traysikelna iti nagsulian ti Barangay San Ramon idi agarup alas onse ti aldaw ti nadakamat a petsa.

Iti panagimbestiga dagiti polis, mapapati a sinabat dagiti suspek ti biktima sada pinaltopaltogan a nakatiruan ti makannawan a panga ti naudi.

Saan a naan-ano ti anak ti biktima a nakalugan iti traysikel.

Nakarekobre dagiti polis iti nakapasamakan ti krimen iti sangapulo a kapsula a nagtaud iti cal. 45 ken maysa a magasin.#