Mannalon, nataso babaen iti paltog

NARVACAN, Ilocos Sur – Dati a susik ti mapapati a motibo ti nangtasuan ken nangballaagan ti maysa nga armado a lalaki iti maysa a mannalon sadiay Barangay Bantay Abot, ditoy nga ili idi rabii ti Marso 29.

Kaso a grave threat ti naikaso ken ni Tony Contillo, residente iti Barangay Quinarayan, Narvacan gapu iti mapapati a panangtaso ken panangballaagna babaen iti paltog ken ni George Cabatic y Panem, 65, naasawaan.

Iti panagimbestiga dagiti polis, mapapati a simrek ni Contillo iti kalapaw da Contillo ken ti kalib-inna a Lina Bello iti tengnga ti kataltalonan a nakaiggem iti pistola, nagpaputok iti naminsan ket kinunana iti biktima:

“Napasawka no makainomka!” sana intaso ti paltog iti makannigid a lapayag ti biktima ken nagsasaruno manen a nagpaputok.

Nakarekobre dagiti nagresponde a polis ken tanod iti nakapasamakan ti insidente iti uppat a kapsula, maysa a bala ken naiputok nga slug a nagtaud amin iti Caliber .380 pistol.

Naiballakad iti biktima nga aglasat iti medico-legal examination tapno adda pagbatayanna no kasuanna ti suspek.#