Mannalon, natupakan iti kayo, natay

SINAIT, Ilocos Sur – Nasarakan nga awanen ti biag ti maysa a mannalon a mapapati a natupakan iti kayo a pinukanna sadiay Barangay Nagongboran ditoy nga ili idi malem ti Mayo 12.

Kalpasan a nakaawatda iti tawag manipud ken ni Barangay Captain Charito Bonifacio, nagturong dagiti polis iti nadakamat a lugar ket nasarakanda ti bangkay ni Amador Peralta y Ibera, 71, naasawaan a napandagan ti barukongna iti ipil-ipil nga agarup 10 pulgada ti diametrona ken agatiddog iti tallo metro.

Iti panagimbestiga dagiti polis, naammuan a nagturong ni Peralta iti natenganna iti dayaen a paset ti balayna tapno agpukan iti kayo.

Mapapati a bayat ti panagpukanna, natuangan ti pinukanna a kayo ket naipandag daytoy iti barukongna a puon ti nakatayanna.

Nagkitakit dagiti kakabagian ti biktima a maipaautopsia ti bangkayna.#