Mannalon, pinaltogan 2 lalaki nakamotorsiklo

STA. MARIA, Ilocos Sur – Ginandat a patayen ti dua a lallaki a nagsakay iti motorsiklo ti maysa a mannalon idi sardam ti Agosto 27 sadiay Sitio Rumas, Barangay Suso ditoy nga ili.

Innaganan dagiti polis ti biktima a ni Joffrey Lazo y Esteban, 32, baro, mannalon ken residente iti Barangay Macaoayan, Burgos, Ilocos Sur.

Segun iti report, ur-urayen ni Lazo ti maysa a managan Richelle Quidangen iti asideg ti waiting shed idi agarup 8:00 ti sardam ti  nadakamat a petsa idi  dua a lallaki a nakalugan iti saggaysada a motorsiklo ti kellaat a nangpaltog iti biktima a nakapuntaan iti ima ken bukotna.

Nupay nasugatan, nakataray ni Lazo ket nagpaarayat. Intaray dagiti nagresponde a polis ti biktima iti Guerrero Memorial Hospital para iti pannakaagasna.

Nakarekobre dagiti polis iti tallo a capsula manipud iti cal .45 iti nakaaaramidan ti pammaltog.

Di pay ammo no ania ti motibo iti nasao a pammaltog.#