Mannalon, pinaltogan ti kabsatna

TAGUDIN, Ilocos Sur – Dead on arrival iti nakaitarayanna nga ospital ti maysa a lalaki kalpasan a pinaltogan ti bukodna a kabsat sadiay Barangay Las-ud ditoy nga ili idi Hunio.

Nabigbig ti biktima a ni Geminiano Gascon Benitez, 46, baro, mannalon, ken residente iti nadakamat a barangay idinto a nainaganan ti kabsatna a pimmaltog kenkuana a ni Antonio Gascon Benitez, 44, naasawaan, ken agnaed met laeng iti nasao a lugar.

Mapapati a nagramut ti pammaltog gapu iti panagpinnabasol dagiti dua a nagtakaw dagiti manokda iti kallabes.

Nakarekobre dagiti polis iti maysa a buneng iti abay ti biktima.

Saanda a nasapulan ti di pay ammo ti klasena a paltog a naaramat iti krimen a mapapati nga inkuyog ti suspek idi naglibas.#