SAN ILDEFONSO, Ilocos Sur – Maysa a shooting incident ti napasamak iti Barangay Kamantirisan ditoy nga ili iti rabii ti Abril 27.
Iti pannakaisurat daytoy, adda pay laeng iti ospital ni Brigido Mendoza y Jaramillo, 44, naasawaan, ken agnaed iti nadakamat a barangay idinto a birbiroken dagiti polis ni Alex Mendoza y Jaramillo, 35, ading ti biktima, a naglibas kalpasan ti pammaltog.
Iti inisial a panagimbestiga dagiti polis, aggiinom ti suspek ken ti biktima iti sanguanan ti balayda idi naparnuay ti nabara nga argumentoda.
Mapapati a simrek ti suspek iti uneg ti balayda ket nagpuesto iti tawa a nakaiggem iti paltog sana pinaputukan ti kabsatna a nakapuntaan ti tengnged daytoy.
Saan a narekobre dagiti inbestigador ti paltog.#