Mannalon, pinaltogan ti kinainomna

NARVACAN, Ilocos Sur – Maysa a mannalon ti saanen a nakipaskua pay kalpasan a pinaltogan ti kinainomna a nakasubangna sadiay Sitio Bulbulala, Barangay Quinarayan, ditoy nga ili idi parbangon ti Disiembre 24.

Immuna a naitaray ni Manuel Mendoza, Jr. Y Canelas, 29, baro, mannalon, iti Central Ilocos Sur District Hospital sa naiyalis iti Metro Vigan Cooperative Hospital, a nakaideklaraanna a dead on arrival.

Nangiwayat dagiti polis iti hot pursuit operation maikontra ken ni Fernando Quiocho y Racacho, 33, baro, mannalon, a naglibas kalpasan ti panangpaltogna ken ni Mendoza, ngem saanda a nasapulan.

Segun iti inbestigasion, naggiinom da Mendoza ken ni Quiocho iti balay ti maysa a Richard Garcia ket adda saanda a nagkinnaawatan a nagtungpal iti panangpaltog ti suspekn iti biktima.

Nakasarak dagiti inbestigador iti tallo a kapsula manipud iti cal. 9mm iti nakapasamakan ti krimen.#