Mannalon ti tabako kadagiti traders: ingatoyo presio iti P30/ kilo

Ni Mancielito S. Tacadena

CANDON CITY – Tapno ipakitada a maymaysada para iti pannakaingato ti presio ti produktoda a tabako, nagpirma dagiti mannalon ti tabako iti Ilocos Sur iti maysa a manipesto bayat ti naangay a panagtataripnongda kadagiti mamayor idi Marso 23 ditoy siudad.

Nailanad iti manipesto ti panangsuportada iti dawat ti gobierno probinsial nga awan ti agilako iti tabako agingga a saan a patgan dagiti aggatgatang a maipangato ti presio iti saan a nababbaba iti P30 kada kilo. Iti agdama mapan a P72-P73 ti agtartaray a presio ti neutral flavor idinto a P92 iti full flavor.

Naipalaon pay iti manipesto ti saan a pannakatadtad ti grado ti mailako a tabako ken mapalukayan ti pannakagradoda. Iti neutral agbalin nga (1) A,B,C (2) D,E,F1,F2 ken (3) reject. Iti met full flavor (1) A,B,C,D,E ken (2) reject.

Kinuna ni LMP-Ilocos Sur President Germelina Goulart a ti naipasa a resolusion ti LMP ken ti manipesto ti agbalin a ngipen dagiti mangisaksakit iti industria ti tabako tapno denggen dagiti tobacco traders ti boses dagitoy.

Dinawat met ni Alilem Mayor Mar Ruel Sumabat kadagiti tobacco farmers a lalo pay a pasayaatenda ti kalidad dagiti binulong ti tabakoda tapno awan pagkunaan dagiti aggatgatang ken awan ti pamkuatanda a mangmenos iti presio ti produktoda.

Indawat met ni San Emilio Mayor Ferdinand Banua ti panagsakripisio pay laeng dagiti mannalon para iti napinpintas a masakbayan ti pagbibiaganda.

“No nakayatayo ti nangisakad iti pamiliatayo kadagiti karigat a bulan nga awan mulatayo a tabako, kasta koma ti ubraentayo ita kangitingit ti labantayo kontra iti nababa a presio ti produktotayo. No masapul a puorantayo amin a bulong ti tabakotayo iti sango dagiti traders aramidentayo no kaipapanan daytoy ti ibabaknang dagiti mannalon kalpasanna,” innayon ti mayor.

Nupay adda iti ballasiw-taaw ni Gov. Chavit Singson bayat ti nasao a miting, kinapatangna dagiti mannalon babaen ti phone patch tapno  patibkerenna ti pakinakemda.

“Saantayo koman a paus-usar kadagiti cigarette manufacturers nga agdemonstrar gapu ta ti personal nga interes dagitoy ti ad-adda a maitantandudo.

Kinuna ti gobernador a ti panagtipon ti Fortune Tobacco ken Phillip Morris ti mangipakita nga awan a talagan ti kompetision ket makonkontrol ti presio.

Insingasing met ni Cervantes Mayor Benjamin Maggay nga agawisda laengen iti sabsabali pay a kompania ti sigarilio tapno maaddaan iti alternatibo a pagilakuanda iti tabako.

Kabayatanna, indawat ti ni Rodolfo Salanga, Presidente ti Philippine Tobacco Institute,   nga ikkanda koma iti sumagmamano nga aldaw tapno kapatangna dagiti padana a tobacco traders tapno idanonna ti sentimiento dagiti mannalon.

“Saan met ngamin a sisiak laeng ti agdesision itoy a banag isu a masapul a pakaammuak pay dagiti dadduma tapno makairuarkami iti maysa a desision,” kinuna ni Salanga.#