Footer

Mannalon, tinagbat ti kalugaranna

NAGBUKEL, Ilocos Sur – Dati a susik ti puon ti nakatagbatan daytoy a mannalon iti Barangay Mission ditoy nga ili idi sardam ti Mayo 3.

Nagpulong iti polis ni Hilario Baga y Oliverio, 56, naasawaan, mannalon ken residente iti nadakamat a barangay a tinagbat idi agarup 8:00 ti sardam ti Mayo 3 ti maysa nga Edmar Oliverio y Crisostomo, 28, baro ken kalugaranna, kaduana ti maysa a Rafael Alwiyao y Manuel, 22, natibo ti Lanna, Tabuk, Kalinga ngem agdama nga aggigian iti nadakamat a barangay.

Segun iti biktima, napan gimmatang iti yelo iti maysa a sari-sari store iti lugarda idi kellaat a dinarup ni Oliverio a nakaiggem iti jungle bolo.

Nagtaray ni Baga iti balayna ngem ur-urayenen ni Rafael a nangmalo iti luppona a nakadalebanna.

Tinagbat ni Oliverio ti biktima a nagsagrapan daytoy iti sugat ti ulo ken makannawan a pungupunguanna.

Naitaray ti biktima iti Central Ilocos Sur District Hospital, Narvacan idinto a naglibas dagiti suspek.

Saan a narekobre dagiti polis ti jungle bolo.#