NARVACAN, Ilocos Sur –  Pinanawan laeng apagbiit ti maysa a negosiante ti tiendana, nakurimes ti kuarta ken selponna.

Ngem babaen ti alibtak ni Ella Molina y Asistin, 50, baak, ken residente iti Barangay Paratong ditoy nga ili, natiliw ti suspek a nagtakaw a ni Jerome Ponce y Piogo, 18, baro, natibo ti Alcala Pangasinan ngem agdama nga agnaed iti Barangay Margaay, Narvacan.

Naammuan iti panagimbestiga dagiti polis nga idi agarup 4:00 ti malem ti Agosto 24, pinanawan ni Molina ti tiendana gapu iti personal a kasapulan ngem idi nagsubli, awanen ti selponna a Nokia 8250 ken cash money nga agdagup iti P140.00.

Nagpaarayat ni Molina idi nakitana ni Ponce a magmagna iti ruar ti balayda, ket kinamat dagiti kaarrubana ti suspek agingga iti nakemmegda.

Idi narikisa ti suspek, nasarakan ti selpon ken kuarta iti ikutna.

Naipaima ti suspek kadagiti nagresponde a polis.#