STO. DOMINGO, Ilocos Sur – Tiniliw dagiti polis ditoy ti maysa a babai a nangsipdut iti kuarta ti maysa a customer bayat ti panagroseriana iti public market ditoy nga ili idi bigat ti Hunio 27.
Nasukainan dagiti polis iti bag ni Annalyn Tinaza y Sinco, 35, naasawaan, ken residente iti Barangay Pug-os, Cabugao, Ilocos Sur ti kuarta a sinikuatna iti bag ni Nena Tagueza y Tabios.
Naammuan iti inbestigasion nga aggatgatang ni Tagueza iti maysa a groseriaan iti uneg ti tiendaan publiko ditoy idi adda nadlawna a nangdungpar kenkuana ket idi sukimatenna ti bagna, nakitana a naluktanen ken adda kuarta nga ikabkabil ti suspek iti bagna.
Dagus a kinompronta ti biktima ti suspek ket pinairuarna ti kuartana.
Naipan ti suspek iti police station para iti pannakapalutpotna.#